Revirada

Revirada es lo traductor automatic del Congrès permanent de la lenga occitana. Es bastit sus la basa del motor Open source Apertium e intègra las melhoras ressorsas de la plataforma occitana de referéncia, locongres.org : 8 diccionaris francés-occitan e occitan-francés, la totalitat de las conjugasons, atal coma las basas toponimicas e terminologicas.

Faguèron mestièr mantuna annada de trabalh a nòstra equipa per crosar e armonizar las donadas dels diferents obratges. De desvolopaments innovants permeton de seleccionar los melhors parelhs de traduccion per un resultat optimal.

Lo traductor cobrís l'ensemble de la diversitat lingüistica infradialectala dins lo sens occitan-francés : Revirada, d'efièit, reconeis mai d'un milion de formas flechidas (mots conjugats e declinats) representativas de la diversitat dels parlars dels airòls gascon e lengadocian.

Dins lo sens francés-occitan, los esfòrces portèron sus la produccion d'una lenga modèrna, coerenta e de qualitat. Mantun centenat de règlas de seleccion lexicala e d'algoritmes de pòst-tractament avançats permeton de garantir una lenga mai autencica possibla. Un sistèma de preferéncias vos permet de cambiar d'unes « traits » lingüistics per produsir un occitan çò mai pròche possible de vòstra jos-varietat.

Aquela primièra version, limitada pel moment a l'occitan lengadocian e a l'occitan gascon, a per tòca de s'enriquesir e de se melhorar. L'otís serà doncas regularament actualizat e, per aquò far, fa mestièr l'ajuda de la comunautat dels utilizators ! Se, quand utilizatz Revirada, vesètz de causas de melhorar, mercés de las nos marcar sus lite.framacalc.org/errorsrevirada-9vh4.